Hapni aplikacionin e motit dhe e shihni që thotë se ka 40% mundësi për shi.
A do të thotë kjo se do të bjerë shi 40% të kohës, në 40% të territorit, apo ka 40% mundësi që të bjerë shi fare?
Një postim në rrjetin social Reddit shkaktoi një debat që tronditi gjithçka që dimë rreth aplikacionit të motit, transmeton Telegrafi.
“Nëse një meteorolog është 80% i sigurt se do të bjerë shi, por pret që ai të mbulojë vetëm 50% të zonës së parashikuar, atëherë parashikimi do të tregonte një shans prej 40% për shi për çdo vendndodhje të caktuar”, thuhet në postim.
“Nëse një meteorolog priste një zonë të përhapur reshjesh me mbulim 100%, por ishte vetëm 40% i sigurt se do të arrinin zonën e parashikuar, kjo do të rezultonte gjithashtu në një shans prej 40% për shi në çdo vendndodhje të caktuar në zonën e parashikuar”, shton përdoruesi Wonderscout1.
Nëse jeni hutuar më parë, ndoshta jeni edhe më i hutuar tani. Për fat të mirë, pati nga ata që dhanë shpjegime shtesë.
“Përqindja tregon probabilitetin që shiu të bjerë në një vendndodhje brenda një zone më të gjerë. Probabiliteti i shiut në të gjithë zonën shumëzohet me përqindjen e zonës që do të preket nga shiu”, thuhet në një nga shpjegimet.
“Kur shihni 40% reshje, kjo do të thotë se ka 40% mundësi që të bjerë shi pikërisht aty ku jeni”, shkroi një komentues tjetër.
Përqindja e treguar në aplikacionet e parashikimit të motit do të thotë probabiliteti që shiu të bjerë në një vend të caktuar në një interval të caktuar kohor – më shpesh është një orë. Pra, nëse thotë “40% mundësi për shi”, kjo vlen për vendndodhjen brenda një ore.
Çdo gjë që kanë thënë komentuesit e Reddit mbështetet nga metodat e mëparshme të përdorura nga meteorologët. Megjithatë, aplikacionet e sotme përdorin të mësuarit automatik dhe inteligjencën artificiale, kështu që parashikimet janë më shpesh specifike për vendndodhjen ku ndodheni.
Pra, nëse shihni “40%” pranë ikonës së reve të shiut në aplikacionin Apple Weather, kjo do të thotë se do të ketë një shans prej 40% për shi në vendndodhjen tuaj gjatë një intervali të caktuar kohor (p.sh. midis orës 12:00 dhe 13:00).
